La mascherèdes
Apede a la mèscres, ai guants, a la fegures sconetes, l’é da rejonèr ence de la mascherèdes, picoi toc de teater spilené da n schiap de atores no de profescion che se impèra na pèrt da dir sù cater o cinch outes via per dut l temp de carnascèr.
Chest teater l’é se sà ben per fascian, desche biot per fascian l’é duta la rimes che disc sù la mèscres, enceben che l Bufon ogne tant l ge n die ence per talian.
I autores
Che scrivea, traslatèa e metea adum tesć de maschèredes n’outa l’era Simon Sorapera de Giulio e dò l’é stat Fabio Dantone de la Menina. Simon de Giulio l’era da Penìa, Fabio l’era da Dèlba, duc doi viventé da n gran amor per sia tera e sia jent, per l teater, per la poejìa e la scritura desche meso per dir e fermèr per semper la vita e la istoria sui papieres. L’é jà vint egn che Simon é se n jit e coscita l’é stat per Fabio acà dotrei egn. L Grop de la Mèscres li recorda con encresciujum e recognoscenza e ogne an l ge fèsc onor ai toi autores tiran cà sia operes, si recorc, sia scola.
